تاريخ عمنا الباشا الجنيه المصرى قصدى الا كان باشا

السلام عليكم ورحمة الله وبركاته



طويل شويه شويتين الموضوع ... بس يارب يشدكم وكل كلمه
تجركم جر لتكملة الموضوع للنهاية

كنت ناوى احطه فى
قسم التاريخ والحضارات ... بس قولت اهو موضوع عام ... ونرجع بيه من تانى



الموضوع بكل بساطه
بيتكلم عن المحروس افندى

الجنيه المصرى


ذلك المخلوق الضعيف المهان حاليا الذى شبع ضربا و ركلا و
تبولت عليه الأيام و الليالى و كلاب الشوارع

من 80 سنه كان هذا السبع الغضنفر إنسان الغاب طويل الناب
يساوى ثلاث دولارات أمريكية و نصف و من فرط قوته كان المصريين بيتعاملوا
بالروبيه الهندية لتيسير امورهم البسيطة و كان هذا الملك يساوى الجنيه
الذهب تقريبا


ما
الذى حدث لسيد العملات عملة الدوله التى تحتضن قناة السويس و الذهب الأبيض
؟؟!!

عند قيام ثورتنا المجيدة بطرد اليهود و الإستيلاء على أملاكهم
تحت إسم التأميم سارع غالبيه أصحاب رؤوس الأموال بوضع اموالهم فى بنوك
أجنبيه بعمله أجنبية و قل الإعتماد و الطلب على العملة المحلية

تأثر الجنيه المصرى بالشائعات القوية
التى سرت فى حرب اليمن من إسقاط مغاوير ثورتنا العظمى لشكائر الذهب
أيووووووه الذهب مش الصفيح و لا الكاوتش و لا الجلد على القبائل اليمنية
لتحارب مع العسكر و المصريين فى حلف الثوار ضد حلف العراعير الذى تقوده
السعوديه و أخواتها من ذوات البرقع و النقاب المظهرى فقط

عمركم شوفتوا حد
عايز يعدى من كلب قاطع الطريق عليه يقوم يقطع ودنه و لا دراعه و يرميها
للكلب علشان يخلى الكلب يسكت ؟؟

و علشان ندارى على الوكسة و الخيبة دى
قررنا قرار خطير جدا جدا جدا


روحنا إشترينا سلاح من موازنه الدوله علشان ندلق إسرائيل فى
البحر ... و شطبنا بيه على ميزانية الدوله تقوم إسرائيل بشطارتها تلم
سلاحنا فى 1967 و عليه 15.000 جثة من أبنائنا و تأخد سلاحنا و تبيعه
لباكستان ب 200 مليون دولار ( السعر عام سبعة و ستين ) علشان تحارب بيه
الهند

اما يهود صحيح ولاد يهود ( زى ما قال عليهم شكسبير )

نقوم إحنا بربطة المعلم نطلع جدعان قوى و
مقطعين السمكة و ديلها زى سعيد صالح و نقول عفا الله عما سلف و ماجاتش من
دى و نطلع اللى فى خزينة الدوله تالت ولا رابع ولا عاشر مرة و نشترى سلاح
تانى و برضه علشان نرمى إسرائيل فى البحر و نشد وراها السيفون ... علشان
نسمعها وهيه بتقول تششششششششششششش

ودارت الأيام و مرت
الأيام ......
بس
المرة دى الزعل و الخصام مش من النوع اللى غنى له العندليب

البلد كانت إتدمرت من الحروب و البنية
التحتية بقت فى الطراوة و كان لازم نجدد البنية التحتية

روحنا لأبناء العم
سكان مضارب و خيام بنى وهاب اللى حربنا كانت السبب فى رفع برميل البترول من
دولارين إلى 28 دولار بالبلدى كده 14 ضعف سعره و غرقتهم فى النعيم اللى هم
فيه و جربوا لأول مرة اللحم الأبيض المتوسط و السكن فى القصور و الفيلات
والاند كروزر والكزس و الباجيرو بدلا من الباعيرو

رحنا نستلف قالولنا تعرفوا شيلوك (تاجر
البندقية فى رواية بنفس الإسم لشكسبير) قولنا نعرفه قالوا ده صبى بقال
بالنسبة لنا عايزين فلوس تعالوا إشتغلوا و خدموا علينا علشان إحنا مش وش
بهدله ( أى و الله)

راح فلاحينا و بنايينا و عمالنا و دكتاترتنا و مهندسيننا و
مدرسيننا يبنوا مجتمعاتهم مقابل التحويلات و التى كانت تستفاد بجزء منها
خزينة الدوله

وهناك عرفنا
الإستهلاك و الفيديو و السوزوكى و الساعات السايكو و التلاجات أم إتنين باب
و غيرها من السلع الإستهلاكية و التى فتحت المجال لفتح بورسعيد كمنطقة حرة
فى أواسط السبعينات لنستورد ما نحتاج و لا نحتاج إليه إبتداء من إبر
الخياطة إنتهاء بالدباديب الفرو و حجارة الولاعات و ميداليات الزيبق

جزء حيوى من اموالنا
ضاع فى السبوبه المسماة الإقتصاد الإسلامى و البيع الحلال و شركات توظيف
الأموال الإسلامية التى بدأت فى أواخر السبعينات و إستمرت حتى هروب أصحابها
خارج البلاد فى أوائل التسعينات و التى حولت الأموال من العملة الوطنيه
لعملات أخرى

فى بداية
التسعينات و مع إنهيار الإتحاد السوفيتى و تفكيك الدوله و بيع كل ما تملكه
فى عهد إنتشار الفساد فى ولاية الرئيس بوريس يلتسن و ما واكبه فى مصر من
زيادة مخيفة لعدد السكان و تفشى البطاله

قام عمنا عاطف عبيد (
أبو وش سمح قوى ) ببدأ خطة الإصلاح الإقتصادى
بمساعده وزير ماليته محمد الرزاز ( أبو دمغه السكرة ) بإضافة ضريبه
المبيعات على ثلاث مراحل قلبت الدنيا راسا على عقب و زاد سعر كل شىء ( من
المفهوم الإقتصادى قلت قيمة العمله مقابل المادة بأشكالها )

لم يوقفها نسبيا إلا حكومة الجنزورى
ووزير تموينه الشهير أحمد جويلى و ما إن أنتهت مرحلة شهر العسل بين
المصريين و حكومة الجنزورى حتى فوجئنا بمهندس الإصلاح الإقتصادى و قد أصبح
أعلى سلطة داخلية فى مصر فى المرحلة السابقة كان أهم ما يؤرقنا الدروس
الخصوصية و إرتفاع أسعار اللحوم.

أما حاليا بعد أن
دخل التليفون المحمول بيوتنا و جيوبنا بالإضافة للسيارت (
بعض العائلات من الطبقة فوق المتوسطة تملك سيارة لكل فرد بمعنى أب و أم و
أربع أولاد لكل منهم سيارة خاصة = 6 سيارات خاصة ) و شاليهات مارينا و
التصييف فى الريف الأسبانى و الفرنسى و إمتلاك كلاب و قطط و سحالى و خلافه )
لأقليه من الشعب فى مقابل أخرين يفطرون بقرصين طعمية و رغيف و يتغدوا
بعلبة كشرى بجنيه و يتعشوا برغيف فينو مغمس فى الشاى

زاد من سقوط الجنيه المصرى المستثمرين
الأجانب أو من المصريين الذين لا يستخدمون العملة المحليه و الذين تحكموا
فى كل شىء و زادت وسائل الميديا الإعلانية من شراهية المصريين لكل ما هو
إستهلاكى ( راجع عدد التليفونات المحموله فى السوق المصرى كمثال )

الطامة الكبرى هى
قيام عمنا عاطف عبيد ب ( تشحيت ) عوامته القديمة للجنيه المصرى كهدية للشعب
المصرى فى إحتفالات رأس السنه 2003 ليرتفع الدولار إلى سبعة جنيهات و
يرتفع معها سعر كل شىء من الصواريخ إلى البرسيم ( الذى لا أجد مبررا لزيادة
سعره ) تعلقا بالدولار

و ما إن إنتهت حكومة حبيبنا عاطف عبيد
حتى أتت حكومة الرجل اللطيف أحمد نظيف و إستبشرنا خيرا , و لكنها كالعاده
صدمتنا بإلغاء وزارتى التموين و الشئون الإجتماعية تمهيدا لحلهما , و إرتفع
سعر الوقود مرتين للكيروسين و زيادة النصف للبنزين و القمح بمشتقاته

و كلنا مازلنا نعانى حتى اليوم و مازال
أمامنا الكثير لنعانيه مع عمنا الملك السابق الملقب بالجنيه المصرى

يلا بينا فى رحله للباشا قصدى اللى كان
باشا






























طبعا ده غير الجنيه اللى اتخرم

زمان كانوا بيقولوا احنا اللى خرمنا
التعريفه

دلواتى نقدر نقول
احنا اللى خرمن الجنيه

************************

أحلى سلام